ഭ്രമരാമ്ബാഷ്ടകമ്
ചാഞ്ചല്യാരുണലോചനാഞ്ചിതകൃപാം ചന്ദ്രാര്ധചൂഡാമണിം
ചാരുസ്മേരമുഖാം ചരാചരജഗത്സംരക്ഷിണീം തത്പദാമ്|
ചഞ്ചച്ചമ്പകനാസികാഗ്രവിലസന്മുക്താമണീരംജിതാം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൧||
കസ്തൂരീതിലകാഞ്ചിതേംദുവിലസത്പ്രോദ്ബാസിഫാലസ്ഥലീം
കര്പൂരദ്രവമിശ്രചൂര്ണഖദിരാമോദോല്ലസദ്വീടികാമ്|
ലോലാപാങ്ഗതരംഗിതൈരതികൃപാസാരൈര്നതാനന്ദിനീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൨||
രാജന്മത്തമരാലമന്ദഗമനാം രാജീവപത്രേക്ഷണാം
രാജീവപ്രഭവാദിദേവമകുടൈ രാജത്പദാമ്ഭോരുഹാമ്|
രാജീവായതപത്രമണ്ഡിതകുചാം രാജാധിരാജേശ്വരീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൩||
ഷട്താരാംഗണദീപികാം ശിവസതീം ഷഡ്വൈരിവര്ഗാപഹാം
ഷട്ചക്രാന്തരസ്ഥിതാം വരസുധാം ഷഡ്യോഗിനീവേഷ്ടിതാമ്|
ഷട്ചക്രാംതിചിതപാദുകാംചിതപദാം ഷഡ്ഭാവഗാം ഷോഡശീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൪||
ശ്രീനാഥാദൃതപാലിതത്രിഭുവനാം ശ്രീചക്രസംചാരിണീം
ഗാനാസക്തമനോജയൗവനലസദ്ഗംധര്വകന്യാദൃതാമ്|
ദീനാനാമതിവേലഭാഗ്യജനനീം ദിവ്യാമ്ബരാലങ്കൃതാം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൫||
ലാവണ്യാധികഭൂഷിതാങ്ഗലതികാം ലാക്ഷാലസദ്രാഗിണീം
സേവായാതസമസ്തദേവവനിതാസീമന്തഭൂഷാന്വിതാമ്|
ഭാവോല്ലാസവശീകൃതപ്രിയതമാം ഭണ്ഡാസുരച്ഛേദിനീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൬||
ധന്യാം സോമവിഭാവനീയചരിതാം ധാരാധരശ്യാമലാം
മുന്യാരാധനമോദിനീം സുമനസാം മുക്തിപ്രധാനവ്രതാമ്|
കന്യാപൂജനസുപ്രസന്നഹൃദയാം കാഞ്ചീലസന്മധ്യമാം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൭||
കര്പൂരാഗരുകുങ്കുമാങ്കിതകുചാം കര്പൂരവര്ണസ്ഥിതാം
കൃഷ്ടോത്കൃഷ്ടസുകൃഷ്ടകര്മദഹനാം കാമേശ്വരീം കാമിനീം|
കാമാക്ഷീം കരുണാരസാര്ദ്രഹൃദയാം കല്പാന്തരസ്ഥായിനീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൮||
ഗായത്രീം ഗരുഡധ്വജാം ഗഗനഗാം ഗാന്ധര്വഗാനപ്രിയാം
ഗമ്ഭീരാം ഗജഗാമിനീം ഗിരിസുതാം ഗന്ധാക്ഷതാലങ്കൃതാമ്|
ഗംഗാഗൗതമഗര്ഗസന്നുതപദാം ഗാം ഗൗതമീം ഗോമതീം
ശ്രീശൈലസ്ഥലവാസിനീം ഭഗവതീം ശ്രീമാതരം ഭാവയേ||൯||
ജയ ജയ ശങ്കര ഹര ഹര ശങ്കര