చిన్నప్పుడు స్వామినాథన్‌ చేతులకు బంగారు మురుగులుండేవి. ఒక రోజు అతడు బయట ఆడుకొంటుంటే, అతని మురుగులను కాజెయ్యాలన్న వుద్దేశ్యంతో వొక దొంగ అతని దగ్గరకు వచ్చాడు. అటూ యిటూ చూసి దగ్గరలో పెద్ద వాళ్లెవరూ లేరని నిర్థారించుకొని అతడు నెమ్మదిగా స్వామినాథన్‌తో ఆ మాట, యీ మాట చెబుతూ, పిల్లవాడి చేతులకున్న మురుగులను సవరించడటం మొదలు పెట్టాడు.

స్వామినాథన్‌ అమాయకుడు, మోసం యెరుగని స్వచ్ఛమైన మనసు అతనిది. పైగా బాల్యం, అందువల్ల ఆ వ్యక్తి దురుద్దేశం అతనికి అర్థం కాలేదు. 'నామురుగులు వదులుగా వున్నాయి కదా!', అని స్వామినాథన్‌ ఆ అపరిచిత వ్యక్తి నడిగాడు. 'అవును', అన్నాడతను. 'అయితే జారి పోకుండా బిగించు', అని హుకుం జారీ చేశాడు బాలకుడు.

'అమ్మో, ఆ పని నాకు రాదు. బంగారప్పని చేసేవాళ్ల దగ్గరకు పోయి చేయించుకుని రావాలి', అని చెప్పాడు ఆ అగంతకుడు.

''అయితే, యింకేం, నువే వీటిని తీసికొని పోయి బిగుతుగా చేయించుకొనిరా!'' - అని మళ్లీ వొక హుకుం జారీ చేశాడు, బాల స్వామినాథన్‌.

''అలాగే!'' అని ఎంతో వినయంగా తల వూపి, నెమ్మదిగా రెండు చేతులకున్న మురుగులు తీసికొని జారుకోబోయాడు. తన రొట్టె అంత తొందరగా విరిగి నేతిలో పడుతుందని వూహించని ఆ చోరుడు.

'ఆగు!', పిలిచాడు స్వామినాథన్‌. ఆ వ్యక్తి బిత్తరపోయాడు, మళ్లీ ఏమొచ్చిందోనని.

'నీ పేరు చెప్పు!'

'పొన్ను స్వామి!'

''భేష్‌! త్వరగా మురుగులు బిగుతు చేయించుకురా, పొన్నుస్వామి!'' కేకేశాడు, బాల స్వామినాథన్‌ వుడాయిస్తున్న మోసకారినే చూస్తూ. తరువాత తాపీగా ఇంటికి వెళ్లి ' నా మురుగులు వదులయి పోతున్నాయి. మీరేమో బిగుతు చేయించరాయె, అందుకని నేనే యిందాక పొన్నుస్వామికిచ్చి పంపించా', అని ఘనంగా చెప్పాడు.

'పొన్నుస్వామి ఎవర్రా?' - అంటే 'పొన్ను స్వామే' నన్న జవాబు వచ్చింది. దానితో ఇంట్లో వాళ్లు ఏదో మోసం జరిగిందని గ్రహించి మురుగులు కాజేసి పోయిన వాడి కోసం వెతికారు. కాని ఆ పొన్నుస్వామి మళ్లీ కనిపిస్తేనా!

Paramacharya pavanagadhalu    Chapters